به‌خێربێن بۆماڵه‌خنجیلانه‌که‌ی هه‌ڵه‌بجه‌       مشتێک له‌خه‌رمانی سه‌رگوزه‌شته‌کانی شار

به‌دیار حیكایه‌تێكه‌وه‌ ..

عومرم  گوزه‌راند .

شیعرى : ئیبراهیم هه‌ورامانى

                             تاران پاییزى -2007       

لێره‌دا باخچه‌یه‌ك و

گوڵێكى سوورى تۆخ .

لێره‌دا دره‌ختێك و

پاسارى یه‌كى  كزۆڵه‌ .

لێره‌دا هه‌ناسه‌یه‌ك و

گه‌لاَیه‌كى زه‌ردى وه‌ریوو .

له‌و به‌رى باخچه‌كه‌وه‌

ئاپارتمانێكى شوشه‌ به‌ند .

جار.....جارىَ

له‌نهۆمێكى به‌رزه‌وه‌

كچێكى نه‌شمیله‌

ده‌لاقه‌ى

په‌نجه‌ره‌ى

ژووره‌كه‌ى

              ده‌كاته‌وه‌ و

به‌ نیگایه‌ك

دوو نیگا ....

عه‌تر بارانى

شه‌قام و

پباسه‌ى هه‌ندى

موسافیران ده‌كا .

لێره‌دا من به‌دیار

حیكایه‌تێكه‌وه‌ عومرم ده‌گوزه‌رێنم .

چه‌ند ده‌كه‌م ،

رِىَ نابه‌مه‌وه‌

سه‌ر رِێگه‌ى رِۆژانى غه‌ریبیم .

چه‌ند ده‌كه‌م ،

زاكیره‌م ،

هه‌نگاوى

پیاسه‌ى شه‌قامى تانیایم

ناناسێته‌وه‌ .

لێره‌دا من ته‌نیام

به‌ته‌نیا ،

وه‌ك  پاسارى یه‌كى به‌نه‌فره‌ت بووى

                         ده‌ست منداڵێكى عه‌جول .

ژیر نابمه‌وه‌ .

وه‌ك دواعومرى دوكه‌ڵى جگه‌ره‌یه‌كى سیخن .

له‌نیوان لێوانى به‌د مه‌ستێك دا .

ئۆقره‌ییم ناگیرسىَ .

ته‌نیایم

به‌قه‌د پانتایى ئه‌م زه‌وى یه‌ نه‌عله‌تی یه‌ .

فراوانه‌ ،

                 له‌گریان و

                 له‌ زه‌حمه‌ت .

چه‌ندى ده‌كه‌م .......

هه‌نگاوه‌كان نامبه‌نه‌وه‌

سه‌ر ئه‌و رِىَ یه‌ى

جىَ پىَ ى ..من و

                ئه‌وى

تێدا جىَ ماوه‌ .

چه‌ندى ده‌كه‌م ...

دار عه‌ساى چاوه‌كانم

                  نامبه‌نه‌وه‌ ،

لاى ئه‌و چڵه‌ گوڵه‌ى

هه‌ناسه‌ى عه‌ترینى ئه‌وى

به‌سه‌ردا باریوه‌ .

لێره‌دا من ته‌نیام ..

ته‌نیا و ته‌نیاتر ده‌بمه‌وه‌ .

لێره‌دا

له‌ژێر رِه‌حمه‌تى دار سنه‌وبه‌رێك دا

رِۆژ هه‌ڵدىَ و

من ته‌نیام .

رۆژ ئاوا ده‌بێت و

من ته‌نیام .

شه‌وو دێت و

               من ته‌نیام .

هه‌موو شتىَ

كۆتایى دىَ

هه‌ر من ته‌نیام .

به‌خێربێن بۆماڵه‌خنجیلانه‌که‌ی هه‌ڵه‌بجه‌       مشتێک له‌خه‌رمانی سه‌رگوزه‌شته‌کانی شار