بێستون حەسەن

وەك چۆن ژیان هەمیشە لە هەڵكشان و داكشاندایە لە ڕووەكانی ئابووری و كۆمەڵایەتییەوە ، هەربەو جۆرەش ئاستی ماددی و مەعنەویش هاتووەتە نێو هاوكێشەكەوە .
ببینە كاتێ مرۆڤایەتی لە دۆخێكی چەق بەستووی وەستاودا بوو چەندە سانا بوون هەموو ئەو خواست و ئارەزووانەی تاك هەیبوو لەسەر شمەك و پێداویستییەكانی ژیان ، ڕەنگە نیان دەرتاڵەكان زیندوو ترین نموونە بن كە چۆن دەگوزەران ، بەڵام كات تێئەپەڕێ و عەقڵ وەك كایەیەكی جوڵاو دەبێتە داینەمۆی گۆڕانكارییەكانی بوون و هەر ئەمیشە كار لە گۆڕینی شێوەی مامەڵە كردن بە ژیانەوە ئەكات لە گوزەرانێكەوە بۆ گوزەرانێكی باشتر و جیاوازتر .
گەر لەدوێنێمانا حەزەكانی مرۆڤ لە پەنجەكانی دەستمان تێ نەدەپەڕین ئەوا ئەمڕۆ خواست و حەز و ئارەزووەكان نەك بە هێندەی فراوان بوون بگرە زۆرجار سنووریشیان بەزاندووە و بەجۆرێ تای تەرازووش نایكێشێ ..
وەك چۆن تەكنەلۆژیا هەمیشە كاریگەری زۆرباشیی داناوە لەسەر ڕەوتی گۆڕانكارییەكان هەربەو جۆرەش مرۆڤی تەمبەڵ و سستی هێناوەتە بوون ، ئەمە توانج نیە لەسەر پێشكەوتنی ئاستی تاك و گۆڕانكارییەكانی سروشت وەك ئەوەی ڕاستییەكی حاشا هەڵنەگرە و ئەكرێ لەسەری بوەستین .
تا دێ حەز بە گۆڕان ئەكەین لە هەموو ڕوویەكەوە ، وەك گۆڕان لە ماڵ و شمەكەكانی ناو ماڵ و گۆڕان لە جل و بەرگ و پێداویستیەكانی ڕۆژانە و تا دەگاتە هەبوونی ئۆتۆمبیل و كۆمەڵە شتانێكی تر كە لەڕاستیدا بوون و نەبوونیان وەك یەكە بەڵام تینوێتی مرۆڤ و خواست لەسەری بووەتە حاڵەتێك كە دەكرێ لەمڕۆدا قسەی لەسەربكرێ ، ئەگەر نا سنوورێك نییە بۆ ڕاگرتنی حەزی مرۆڤەكان لەسەر گۆڕانكارییەكانی ژیانی .
كەواتە بەرلەوەی ئەم گۆڕانە بە نەگەتیڤ بشكێتەوە بەسەرماندا و حەز نەبێتە كایەیەكی كارا و عەقڵ وەلاوە بنێ،دەكرێ خۆمان بەو پێیەی ژیان لەبەرچاوماندایەو خۆشمان تاكێكین لەو ژیانە ، دەست بردنمان بۆ هەموو شتێ سنوور نەبەزێنێ و ئەوەندە بەگوێی عەقڵیشمان بكەین كە گیرفانمان ڕێی پێ بدا، نەك حەز بكەینە خاڵی جەوهەری ژیانمان ، دەنا بەجۆری جێدەمێنێین پەشیمانیش دادمان نەدا .